គេហនិទានុលេខន៍យើងនេះ មានគោលបំណងផ្សព្វផ្សាយ បទដ្ឋានគតិយុត្តដល់និស្សិត អ្នកស្រាវជ្រាវទាំងឡាយ ដែលត្រូវការជំនួយក្នុងការសិក្សាស្រាវជ្រាវ ។ ជាពិសេ វាជាមធ្យោបាយមួយសម្រាប់នាំ ផ្លូវទៅរកគេហទំព័រ និង ប្លក់ផ្សេងៗ ទាំងឡាយ ដែលទាក់ទងនឹង វិស័យច្បាប់។

Wednesday, December 21, 2011

លីប៊ីនិងតុលាការក្រុងឡាអេដណ្តើមគ្នាកាត់ទោសកូនប្រុសរបស់លោកកាដាហ្វ៊ី

ធ្នូ 22

Posted by vannarachin

ប្រភព៖ RFI (http://www.khmer.rfi.fr/libya-refuse-to-hand-over-gaddafi-son-to-icc)

ដោយ សេង ឌីណា

សាយីហ្វ អាល់អ៊ីស្លាម (Saïf al Islam) កូនប្រុសរបស់លោកកាដាហ្វ៊ី ត្រូវបានអាជ្ញាធរលីប៊ីចាប់ខ្លួន កាលពីថ្ងៃសៅរ៍ ទី១៩ វិច្ឆិកា ២០១១។ ក្រោយពីបានទទួលដំណឹងអំពីការចាប់ខ្លួននេះ តុលាការព្រហ្មទណ្ឌអន្តរជាតិ ដែលមានទីតាំងនៅទីក្រុងឡាអេ បានទាមទារឲ្យអាជ្ញាធរលីប៊ីបញ្ជូនខ្លួនសាយីហ្វ អាល់អ៊ីស្លាម ទៅកាត់ទោសនៅឡាអេ។ ក៏ប៉ុន្តែ លីប៊ីបានទាមទារកាត់ទោសកូនប្រុសរបស់លោកកាដាហ្វ៊ី នៅក្នុងប្រទេសលីប៊ី។

សាយីហ្វ អាល់អ៊ីស្លាម ស្ថិតក្នុងចំណោមជនសង្ស័យទាំង ៣រូប ដែលតុលាការព្រហ្មទណ្ឌអន្តរជាតិចេញដីកាចាប់ខ្លួន ពីបទឧក្រិដ្ឋកម្មប្រឆាំងមនុស្សជាតិ ប្រព្រឹត្តទៅលើបាតុករប្រឆាំងនៅលីប៊ី។ ថ្វីដ្បិតតែលីប៊ីមិនមែនជាសមាជិកអនុសញ្ញាក្រុងរ៉ូម (ស្តីពីការបង្កើតតុលាការព្រហ្មទណ្ឌអន្តរជាតិ) ក៏ប៉ុន្តែ ដំណើរការស៊ើបអង្កេតលើបទឧក្រិដ្ឋរបស់លោកកាដាហ្វ៊ី និងបក្សពួក ត្រូវបានធ្វើឡើង ទៅតាមសេចក្តីសម្រេចរបស់ក្រុមប្រឹក្សាសន្តិសុខអ.ស.ប.។

កាលពីថ្ងៃសៅរ៍ ម្សិលមិញនេះ អ្នកនាំពាក្យរដ្ឋអាជ្ញាតុលាការក្រុងឡាអេបានថ្លែងថា លីប៊ីមានកាតព្វកិច្ចសហការជាមួយតុលាការអន្តរជាតិ ហើយត្រូវតែបញ្ជូនខ្លួន សាយីហ្វ អាល់អ៊ីស្លាម ទៅឲ្យតុលាការក្រុងឡាអេ ទៅតាមការសម្រេចរបស់ក្រុមប្រឹក្សាសន្តិសុខអ.ស.ប.។ ចំណែកអាជ្ញាធរលីប៊ីវិញ ទាមទារកាត់ទោសកូនប្រុសរបស់លោកកាដាហ្វ៊ី ដោយតុលាការជាតិលីប៊ី។

យោងតាមគោលការណ៍ នៃនីតិព្រហ្មទណ្ឌអន្តរជាតិ (ជាភាសាបារាំង Principe de subsidiarité) ក្នុងករណីមានការប្រជែងគ្នារវាងតុលាការជាតិ និងតុលាការអន្តរជាតិ ទៅលើសំណុំរឿងតែមួយ គេត្រូវទុកអាទិភាពទៅឲ្យតុលាការជាតិជាអ្នកជំនុំជម្រះ។ តុលាការក្រុងឡាអេមានសមត្ថកិច្ចជំនុំជម្រះ លុះត្រាតែ តុលាការជាតិមិនព្រមជំនុំជម្រះ ឬក៏ទាមទារចង់ជំនុំជម្រះដែរ ប៉ុន្តែ មិនមានសមត្ថភាពគ្រប់គ្រាន់ ក្នុងការរៀបចំការកាត់ទោសប្រកបដោយលក្ខណៈយុត្តិធម៌។

ដូច្នេះ ជាគោលការណ៍ អំណាចជំនុំជម្រះលើកូនប្រុសរបស់លោកកាដាហ្វ៊ី ត្រូវធ្លាក់ក្នុងដៃតុលាការជាតិលីប៊ី។ ក៏ប៉ុន្តែ តុលាការក្រុងឡាអេនៅតែអាចទាមទារយកសាយីហ្វ អាល់អ៊ីស្លាមមកកាត់ទោសបាន ដោយលើកហេតុផលថា តុលាការលីប៊ីបច្ចុប្បន្នមិនមានលក្ខណៈឯករាជ និងអព្យាក្រឹត ក្នុងការផ្តល់យុត្តិធម៌ដល់ជនជាប់ចោទ។

អស់រយៈពេលរាប់សិបឆ្នាំមកហើយ ដែលលីប៊ីមិនដែលមានរចនាសម្ព័ន្ធតុលាការប្រកបដោយលក្ខណៈឯករាជ្យ និងអព្យាក្រឹត។ ក្រោយពីរបបដឹកនាំរបស់លោកកាដាហ្វ៊ីដួលរលំទៅ ប្រព័ន្ធតុលាការថ្មីក៏នៅមិនទាន់ត្រូវបានគេរៀបចំឡើងត្រឹមត្រូវ។ សូម្បីតែរដ្ឋាភិបាល ក៏លីប៊ីនៅមិនទាន់បង្កើតបានផង។ ម្យ៉ាងវិញទៀត អាជ្ញាធរលីប៊ីបច្ចុប្បន្ននេះ គឺជាគូសត្រូវរបស់លោកកាដាហ្វ៊ី។ ការកាត់ទោសអ្នកចាញ់ ដោយតុលាការរបស់អ្នកឈ្នះ កម្រនឹងធ្វើឡើងប្រកបដោយយុត្តិធម៌ណាស់។ ការសម្លាប់លោកកាដាហ្វ៊ី ក្រោយការចាប់ខ្លួន ដោយមិនឆ្លងកាត់ការជំនុំជម្រះត្រឹមត្រូវនោះ ក៏រឹតតែធ្វើឲ្យសហគមន៍អន្តរជាតិមិនទុកចិត្តលើតុលាការរបស់លីប៊ីថែមទៀត។

ទោះជាយ៉ាងណា តុលាការក្រុងឡាអេមិនបានបដិសេធចោលទាំងស្រុងករណីកាត់ទោសសាយីហ្វ អាល់អ៊ីស្លាម នៅក្នុងប្រទេសលីប៊ីនោះដែរ។ កាលពីថ្ងៃសៅរ៍ ម្សិលមិញនេះ អ្នកនាំពាក្យរដ្ឋអាជ្ញារបស់តុលាការព្រហ្មទណ្ឌអន្តរជាតិបានថ្លែងថា ប្រសិនបើអាជ្ញាធរលីប៊ីចង់កាត់ទោសសាយីហ្វ អាល់អ៊ីស្លាម នៅក្នុងប្រទេសលីប៊ី ពួកគេត្រូវតែដាក់សំណើសុំមកតុលាការក្រុងឡាអេឲ្យប្រគល់សមត្ថកិច្ចជំនុំជម្រះទៅតុលាការជាតិវិញ។ ក្នុងករណីនេះ ដំណើរការជំនុំជម្រះដោយតុលាការលីប៊ីត្រូវតែធ្វើឡើងស្របទៅតាមនីតិវិធី និងបទចោទប្រកាន់ ដែលមានចែងក្នុងដីកាចាប់ខ្លួន ចេញដោយតុលាការក្រុងឡាអេ។

អ្នកនាំពាក្យរូបនេះក៏បានឲ្យដឹងផងដែរថា លោក ល្វីស ម៉ូរេណូ អូកាំប៉ូ (Luis Moreno Ocampo) រដ្ឋអាជ្ញាតុលាការព្រហ្មទណ្ឌអន្តរជាតិនឹងធ្វើដំណើរទៅកាន់ប្រទេសលីប៊ី នៅសប្តាហ៍ក្រោយនេះ ដើម្បីជជែកជាមួយមន្រ្តីរដ្ឋាភិបាលបណ្តោះអាសន្នលីប៊ី រកដំណោះស្រាយជុំវិញការកាត់ទោស សាយីហ្វ អាល់អ៊ីស្លាម។

បណ្តាប្រទេសលោកខាងលិច ព្រមទាំងអង្គការសិទ្ធិមនុស្សអន្តរជាតិនានា បាននាំគ្នាទាមទារឲ្យអាជ្ញាធរលីប៊ីសហការជាមួយតុលាការព្រហ្មទណ្ឌអន្តរជាតិ ក្នុងការកាត់ទោសកូនប្រុសរបស់លោកកាដាហ្វ៊ី៕

TAGS: តុលាការព្រហ្មទណ្ឌអន្តរជាតិ - លីប៊ី

បានចុះផ្សាយក្នុង នីតិឯកជន | កែប្រែ

ប្រភព៖ RFI ( http://www.khmer.rfi.fr/)

ដោយ សេង ឌីណា

នៅក្នុងពេលដែលប្រទេសមហាអំណាចឧស្សាហកម្ម ដូចជា អាមេរិក និងប្រទេសនៅអឺរ៉ុប ជាដើម កំពុងផុងខ្លួនក្នុងវិបត្តិប្រាក់បំណុល អ្នកវិនិយោគកំពុងតែងាកទៅចាប់អារម្មណ៍លើការវិនិយោគលើមូលបត្របំណុលរបស់ប្រទេសកំពុងអភិវឌ្ឍវិញម្តង ជាពិសេស ប្រទេសដែលកំពុងតែមានការរីកលូតលាស់ខ្លាំង ដូចជា ប្រេស៊ីល ឥណ្ឌា ម៉ិកស៊ិក អាហ្វ្រិកខាងត្បូង ជាដើម។

នៅពេលបច្ចុប្បន្ននេះ ទីផ្សារមូលបត្របំណុលរបស់ប្រទេសកំពុងអភិវឌ្ឍ ដែលមានកំណើនសេដ្ឋកិច្ចខ្ពស់ មានទំហំរហូតដល់ទៅប្រមាណពី ១០% ទៅ ១៥% នៃទីផ្សារពិភពលោក ពោលគឺ កើនឡើងទ្វេដង បើធៀបនឹងកាលពី១០ឆ្នាំមុន។

ស្ថាប័នហិរញ្ញវត្ថុជាច្រើនបានឲ្យដឹងថា ចាប់តាំងពីវិបត្តិប្រាក់បំណុលផ្ទុះឡើងនៅអាមេរិក និងនៅអឺរ៉ុប មូលបត្របំណុលរបស់ប្រទេសកំពុងអភិវឌ្ឍបានទាក់ទាញអ្នកវិនិយោគកាន់តែខ្លាំងឡើងថែមទៀត។ មូលហេតុ គឺមានពីរធំៗ៖ ហានិភ័យទាប និងផលចំណេញខ្ពស់។
ក្នុងពេលដែលសេដ្ឋកិច្ចរបស់ប្រទេសមហាអំណាចឧស្សាហកម្មកំពុងមានកំណើនដ៏តិចតួច (ឬគ្មានកំណើនសោះនៅប្រទេសខ្លះ) ហើយត្រូវខ្ចីបុលលុយគេ ដើម្បីមកបំពេញការចំណាយ តម្រូវទៅតាមរបៀបរស់នៅហ៊ឺហា ប្រទេសកំពុងអភិវឌ្ឍវិញ មានកំណើនសេដ្ឋកិច្ចខ្ពស់ផង និងចាត់ចែងថវិកាជាតិបានល្អផង។
យោងតាមមូលនិធិរូបិយវត្ថុអន្តរជាតិ (IMF) ប្រាក់បំណុលសាធារណៈរបស់ប្រទេសមហាអំណាចឧស្សាហកម្ម គិតជាមធ្យម មានរហូតដល់ទៅ ៩០% នៃផលិតផលក្នុងស្រុកសរុប។ ចំណែកប្រាក់បំណុលរបស់ប្រទេសកំពុងអភិវឌ្ឍវិញ គឺមានត្រឹមតែ ៤០% ប៉ុណ្ណោះ។ ប្រទេសកំពុងអភិវឌ្ឍខ្លះ ដូចជា រុស្ស៊ី ជាដើម មានប្រាក់បំណុលត្រឹមតែជាង ១១% ប៉ុណ្ណោះ។
ជាលទ្ធផល ចំណាត់ថ្នាក់ឥណទានរបស់ប្រទេសអ្នកមានត្រូវបានទីភ្នាក់ងារវាយតម្លៃហានិភ័យបំណុលទម្លាក់ចុះជាបន្តបន្ទាប់។ ចំណែកចំណាត់ថ្នាក់ឥណទានរបស់ប្រទេសកំពុងអភិវឌ្ឍវិញ ថ្វីដ្បិតតែនៅទាបជាងប្រទេសអ្នកមាន ក៏ប៉ុន្តែ បន្តកើនឡើងជាប់ជានិច្ច។ ក្នុងរយៈពេលប្រមាណមួយឆ្នាំកន្លងទៅនេះ គេសង្កេតឃើញថា ចំណាត់ថ្នាក់ឥណទានរបស់ ប្រេស៊ីល ឥណ្ឌូណេស៊ី ថៃ ម៉ាឡេស៊ី ហ្វ៊ីលីពីន ជាដើម សុទ្ធតែបានកើនឡើង។

ម្យ៉ាងវិញទៀត ការវិនិយោគលើមូលបត្របំណុលរបស់ប្រទេសកំពុងអភិវឌ្ឍផ្តល់នូវផលចំណេញ គិតជាមធ្យម ៦% ពោលគឺ ប្រមាណជា ៣ដង ច្រើនជាងផលចំណេញពីការវិនិយោគលើមូលបត្របំណុលប្រទេសមហាអំណាចឧស្សាហកម្ម។ មូលបត្របំណុលរបស់ប្រេស៊ីលវិញ អាចផ្តល់ផលចំណេញរហូតដល់ទៅប្រមាណ ១២%៕

ប្រភព៖ RFI ( http://www.khmer.rfi.fr/f)

ដោយ សេង ឌីណា

ចាប់តាំងពីមានវិបត្តិប្រាក់បំណុលនៅអឺរ៉ុប និងអាមេរិក គេតែងឮស្ទើរតែរៀងរាល់ថ្ងៃនូវព័ត៌មាន ស្តីពីទីភ្នាក់ងារវាយតម្លៃហានិភ័យបំណុល។ សេចក្តីសម្រេចរបស់ទីភ្នាក់ងារទាំងនេះអាចធ្វើឲ្យទីផ្សារមូលបត្រច្រួលច្របល់ ឬអាចធូរស្រាលមកវិញ។ សូម្បីតែរដ្ឋាភិបាលនៃប្រទេសមហាអំណាចសេដ្ឋកិច្ចក៏ព្យាយាមធ្វើតម្រូវចិត្តទីភ្នាក់ងារវាយតម្លៃហានិភ័យដែរ។

ទីភ្នាក់ងារវាយតម្លៃហានិភ័យបំណុល (Credit Rating Agency) មានចំនួនច្រើន ក៏ប៉ុន្តែ គេសង្កេតឃើញមានទីភ្នាក់ងារតែ៣ប៉ុណ្ណោះ ដែលគ្រប់គ្រងចំណែកទីផ្សារពិភពលោកច្រើនជាងគេ គឺ Standard and Poor’s, Moody’s និង Fitch។ ទីភ្នាក់ងារទាំងនេះ គឺជាស្ថាប័នឯកជន ដែលមានមុខងារវាយតម្លៃមើលថា តើការវិនិយោគលើមូលបត្របំណុលរបស់ក្រុមហ៊ុនមួយ ឬប្រទេសមួយ មានហានិភ័យកម្រិតណា?

ចំណាត់ថ្នាក់ឥណទានរបស់រដ្ឋត្រូវគេកំណត់ដោយពិនិត្យទៅលើហានិភ័យក្នុងវិស័យចំនួនបី៖ នយោបាយ សេដ្ឋកិច្ច និងប្រព័ន្ធហិរញ្ញវត្ថុ។ ចំណាត់ថ្នាក់នេះ ត្រូវគេកំណត់ដោយអក្សរ ចាប់ពី AAA (ចំណាត់ថ្នាក់ល្អជាងគេ មានន័យថា ហានិភ័យបំណុលមានទាបបំផុត) រហូតដល់ D (ក្ស័យធន)។

ចំណាត់ថ្នាក់ឥណទាន គឺជាព័ត៌មានដ៏សំខាន់មួយ សម្រាប់ជាជំនួយដល់អ្នកវិនិយោគ ក្នុងការសម្រេចធ្វើវិនិយោគ។ ដូច្នេះ ប្រសិនបើទីភ្នាក់ងារវាយតម្លៃហានិភ័យបំណុលទម្លាក់ចំណាត់ថ្នាក់ឥណទានរបស់ប្រទេសណាមួយ វានឹងអាចធ្វើឲ្យមូលបត្របំណុលរបស់ប្រទេសនោះធ្លាក់ថ្លៃ មានន័យថា អ្នកវិនិយោគមិនសូវចង់ឲ្យលុយប្រទេសនោះខ្ចី ហើយអត្រាការប្រាក់កម្ចីនោះ មានកម្រិតខ្ពស់។

ដូចនេះហើយបានជាប្រទេសនីមួយៗព្យាយាមធ្វើយ៉ាងណារក្សាចំណាត់ថ្នាក់ឥណទានឲ្យបានខ្ពស់បំផុត តាមដែលអាចធ្វើទៅបាន។

ក៏ប៉ុន្តែ អ្នកខ្លះបានរិះគន់ថា ទីភ្នាក់ងារវាយតម្លៃហានិភ័យបំណុលជាអ្នកធ្វើឲ្យវិបត្តិបំណុលកាន់តែធ្លាក់ចុះដុនដាប។ នៅពេលដែលចំណាត់ថ្នាក់ឥណទានរបស់ប្រទេសមួយត្រូវគេបញ្ចុះ មូលបត្របំណុលរបស់ប្រទេសនោះនឹងត្រូវធ្លាក់ថ្លៃ ហើយអត្រាការប្រាក់នឹងត្រូវកើនឡើង។ នៅពេលនោះ អ្នកវិនិយោគដែលមានមូលបត្រនេះក្នុងដៃក៏នឹងនាំគ្នាលក់ចេញ។ អ្នកលក់មានច្រើន ចំណែកអ្នកទិញមិនសូវមាន វានឹងធ្វើឲ្យអត្រាការប្រាក់កាន់តែកើនឡើងថែមទៀត។ ប្រទេសដែលត្រូវគេទម្លាក់ចំណាត់ថ្នាក់ ក៏ត្រូវប្រឈមមុខនឹងវិបត្តិប្រាក់បំណុលកាន់តែធ្ងន់ធ្ងរជាងមុនទៀត។

អ្នកនយោបាយមួយចំនួន នៅក្នុងតំបន់អឺរ៉ូ មានការសង្ស័យថា ទីភ្នាក់ងារវាយតម្លៃហានិភ័យបំណុលធំៗទាំងបី គឺ Standard and Poor’s, Moody’s និង Fitch (ដែលសុទ្ធសឹងជាទីភ្នាក់ងារបង្កើតឡើង នៅសហរដ្ឋអាមេរិក) មានចេតនាបង្កចលាចលនៅអឺរ៉ុប ដើម្បីបង្វែរចំណាប់អារម្មណ៍ពីអាមេរិក ដែលកំពុងជួបនឹងវិបត្តិបំណុលដែរ។

ម្យ៉ាងវិញទៀត ការធ្វេសប្រហែសក្នុងការវាយតម្លៃហានិភ័យឥណទានអចលនទ្រព្យនៅអាមេរិក (Subprime) ដែលជាដើមហេតុនៃវិបត្តិសេដ្ឋកិច្ចពិភពលោក ឆ្នាំ២០០៨ ក៏ជាចំណុចដ៏សំខាន់មួយដែរ ដែលធ្វើឲ្យគេរិះគន់ទីភ្នាក់ងារវាយតម្លៃហានិភ័យបំណុល៕

TAGS: វិបត្តិបំណុល - សហភាពអឺរ៉ុប

Sunday, December 18, 2011

ក្រុមហ៊ុនធំៗរបស់ជប៉ុនស្វែងរកឱកាសនៅកម្ពុជា

ប្រភព ៖ ភ្នំពេញប៉ុស្ត៍ FRIDAY, 16 DECEMBER 2011 12:03

ម៉ៃ គុណមករា

ភ្នំពេញៈ ក្រុមហ៊ុនធំៗរបស់ជប៉ុនប្រមាណជា៣៥ក្រុមហ៊ុន កំពុងស្វែងរកការធ្វើពាណិជ្ជកម្ម និងឱកាសវិនិយោគនៅប្រទេសកម្ពុជា។ នេះបើតាមអគ្គនាយកសភាពាណិជ្ជកម្មកម្ពុជា។

លោក ងួន ម៉េងតិច អគ្គនាយកសភាពាណិជ្ជកម្មកម្ពុជាបានឲ្យដឹងថា ក្រុមពាណិជ្ជករ ដែលដឹកនាំដោយប្រធានពាណិជ្ជកម្ម ឧស្សាហកម្មជប៉ុន លោក Kouhei Watanabe បានជួបជាមួយ លោក គិត ម៉េង ប្រធានសភាពាណិជ្ជកម្មកម្ពុជា (CCC) កាលពីថ្ងៃព្រហស្បតិ៍ម្សិលមិញ។

លោកបន្តថា ក្រុមហ៊ុនទាំងនោះមកពីវិស័យធនាគារ វិស័យហិរញ្ញវត្ថុ ឧស្សាហកម្ម ដែលរួមទាំងក្រុមហ៊ុន តូយ៉ូតា និងមីតស៊ុយប៊ីស៊ី បានជួបជាមួយពាណិជ្ជករនៅក្នុងស្រុកប្រមាណជា៣៧ក្រុមហ៊ុន។

លោកបានបន្តទៀតថា៖ «ពួកគេចង់ដឹងបន្ថែមពីឱកាសពាណិជ្ជកម្មពីយើង ព្រោះពួកគេចង់ពង្រីកការវិនិយោគ និងកិច្ចសហប្រតិបត្តិការពាណិជ្ជកម្មរវាងប្រទេសទាំងពីរ។ ពួកគេសួរយើងពីវិស័យអាទិភាពនៅកម្ពុជា ហើយយើងក៏ប្រាប់គេថា រដ្ឋាភិបាលកំពុងចេញគោលនយោបាយនាំចេញអង្ករ ដើម្បីបង្កើនការនាំចេញ»។

បើទោះបីយ៉ាងនេះក្តី លោក ងួន ម៉េងតិច បាននិយាយថា មិនទាន់មានកិច្ចព្រមព្រៀងណាមួយត្រូវបានធ្វើឡើងក្នុងជំនួបកាលពីថ្ងៃម្សិលមិញនោះទេ។

លោកថ្លែងថា៖ « យើងមិនប្រាកដនៅឡើយទេ ថា វិស័យអ្វីដែលពួកគេចាប់អារម្មណ៍ ពីព្រោះពួកគេធ្វើការច្បាស់ណាស់មុននឹងសម្រេចចិត្តវិនិយោគក្នុងវិស័យណាមួយ»។

សភាពាណិជ្ជកម្មកម្ពុជាបានចុះហត្ថលេខាលើអនុស្សរណៈយោគយល់គ្នា(MoU) មួយស្តីពីការផ្លាស់ប្តូរព័ត៌មានពាណិជ្ជកម្ម និងវិនិយោគជាមួយសភាពាណិជ្ជកម្ម ឧស្សាហកម្មជប៉ុន អស់រយៈពេលជាច្រើនឆ្នាំមកហើយ។

អគ្គនាយកសភាពាណិជ្ជកម្មកម្ពុជារូបនេះ និយាយថា ក្រុមហ៊ុនមកពីជប៉ុនមួយចំនួន ដូចជា អាជីណូម៉ូតូ យ៉ាម៉ាហាម៉ូទ័រ និង Minebea បានបង្កើតរោងចក្រនៅកម្ពុជារួចរាល់ហើយ៕SS

ការប្រព្រឹត្តបទឧក្រិដ្ឋក្នុងប្រព័ន្ធហិរញ្ញវត្ថុរបស់ពួកវិនិយោគិនធំៗ

ប្រភពៈ ភ្នំពេញប៉ុស្ត៍ WEDNESDAY, 16 NOVEMBER 2011 12:00

ANTHONY GALLIANO

ក្រដាសប្រាក់ដុល្លារអាមេរិកដែលគេចងជាដុំៗនៅធនាគារមួយនៅអាមេរិក។ រូបថត Bloomberg

ភ្នំពេញៈ Al Capone ដែលគេស្គាល់ថា ជាសត្រូវលេខមួយរបស់សាធារណជន ប្រហែលជាបុគ្គលសំខាន់ម្នាក់ ក្នុងចំណោមឧក្រិដ្ឋជនល្បីល្បាញខាងរឿងអាក្រក់បំផុតនៅអាមេរិក។

ចំណែកលោក John Dillinger, Lucky Luciano និង John Gotti ជាឧក្រិដ្ឋជនប្រវត្តិសាស្ត្រដ៏ល្បីល្បាញ។ ចំណែកលោក Bernie Ebbers, Dennis Kozlowski និង Bernie Madoff អាចមិនមែនជាបុគ្គលល្បីល្បាញ ប៉ុន្តែពួកគេក៏ជាឧក្រិដ្ឋជនដែលល្បីល្បាយដោយសារតែអ្នកទាំងនោះ ត្រូវបានកាត់ទោសពីករណីផ្សេងៗគ្នា។

អ្នកទាំងនេះបានប្រព្រឹត្តបទល្មើសទាក់ទងនឹងការងារប្រើប្រាជ្ញា បទឧក្រិដ្ឋមិនប្រើអំពើហិង្សា ក្នុងនោះរាប់បញ្ចូលទាំងការឆបោក ប្រតិបត្តិការហិរញ្ញវត្ថុខុសច្បាប់ សូកប៉ាន់ ការធ្វើពាណិជ្ជកម្មផ្ទៃក្នុង ការរំលោភសេចក្តីទុកចិត្ត និងការបោកប្រាស់ដែលជាធម្មតាករណីនេះត្រូវបានប្រព្រឹត្តដោយ ក្រុមហ៊ុន ពាណិជ្ជករ ឬមន្ត្រីរដ្ឋាភិបាល។

លោក Edwin Sutherland ធ្វើឲ្យមានភាពល្បីល្បាញនូវពាក្យ ថា«បទឧក្រិដ្ឋដោយពាណិជ្ជករធំៗ» លើកដំបូងកាលពីឆ្នាំ១៩៣៩។ លោកបានបង្កើតទ្រឹស្តីមួយថា បទឧក្រិដ្ឋ គឺជាសកម្មភាពដែលបានប្រព្រឹត្តនៅគ្រប់សង្គម គ្រប់ជាន់ថ្នាក់ទាំងអស់ ដោយបុគ្គលណាម្នាក់ តាមរយៈស្ថាប័នធំៗ និងមានអំណាច។

Bernie Ebbers ជាសហស្ថានិក និងជាប្រធាននាយកប្រតិបត្តិក្រុមហ៊ុន Worldcom ហើយកាលពីឆ្នាំ២០០២ លោកត្រូវបានគេចាត់ទុកថា ជាជនដែលបង្កឲ្យមានរឿងអាស្រូវ គណនេយ្យដ៏ធំបំផុតក្នុងប្រវត្តិសាស្ត្រអាមេរិក។ Worldcom បានកេងយកចំណេញពីការចំណាយប្រតិបត្តិការធម្មតា អស់រយៈពេលជាច្រើនឆ្នាំ ហើយបានបង្កើនប្រាក់ចំណូលតាមរយៈការបញ្ចូលគណនីក្លែងក្លាយ ដែលមានទឹកប្រាក់សរុប១១ពាន់លានដុល្លារ។

ការឆបោកទាំងនេះ បានធ្វើឲ្យប្រាក់ចំណេញសម្រាប់អាជីវកម្មនេះ កើនឡើង ដែលតាមការពិតទៅក្រុមហ៊ុននេះមិនបានរកប្រាក់ចំណេញបានសោះឡើយ។ មិនត្រឹមតែប៉ុណ្ណោះ លោក Ebbers ក៏បានបញ្ចុះបញ្ចូលក្រុមប្រឹក្សាភិបាលរបស់ក្រុមហ៊ុន ដើម្បីផ្តល់ប្រាក់កម្ចីដល់លោក ចំនួនជាង ៤០០លានដុល្លារអាមេរិក ដើម្បីឲ្យលោកអាចយកប្រាក់ទាំងនោះ ទៅប្រើប្រាស់សម្រាប់ជាប្រយោជន៍ផ្ទាល់ខ្លួន។ ទន្ទឹមនឹងនេះដែរ លោក Ebbers ជាសមាជិកវិហារ Easthaven Baptsit Church ដែលរកប្រាក់ចំណេញបានយ៉ាងច្រើន ហើយលោកក៏បានទៅបង្រៀននៅសាលាថ្ងៃអាទិត្យជាប្រចាំផងដែរ។

ក្រៅពីបុគ្គលិកចំនួនប្រហែល ៣០ពាន់នាក់បានបាត់បង់ការងារធ្វើក៏នៅមានវិនិយោគិនជាច្រើនទៀត ដែលបានខាតបង់ទឹកប្រាក់ជាង១០០លានដុល្លារ ដោយសារតែភាគហ៊ុន បានធ្លាក់ចុះពីជាង៦០លានដុល្លារ មកនៅត្រឹម ២០សេនប៉ុណ្ណោះ។ បច្ចុប្បន្ន លោក Ebber បានជាប់ឃុំរយៈពេល២៥ឆ្នាំ ដោយសារតែការឆបោកមូលបត្រ និងការបង្កើតគំនិតក្បត់។

លោក Dennis Kozlowski ជាប្រធាននាយកប្រតិបត្តិប្រចាំក្រុមហ៊ុនTyco International។ លោក Kozlowski និងលោក Mark Swartz ដែលជាប្រធាននាយកហិរញ្ញវត្ថុ ត្រូវបានគេជឿជាក់ថាបានលួចប្រាក់ចំនួន ៦០០លានដុល្លារពីក្រុមហ៊ុនតាមរយៈកម្ចី និងការលក់ភាគហ៊ុនក្លែងក្លាយ។ លោក Kozlowski ត្រូវបានគេស្គាល់តាមរយៈរបៀបរស់នៅដោយការចាយវាយខ្ជះខ្ជាយ ឲ្យក្រុមហ៊ុនបង់ថ្លៃផ្ទះល្វែងស្នាក់នៅរបស់លោក៣០លានដុល្លារ ដែលក្នុងនោះ រាប់បញ្ចូលទាំងទឹកផ្កាឈូកក្នុងបន្ទប់តម្លៃ៦ពាន់ដុល្លារ និង ១លានដុល្លារ សម្រាប់ពិធីជប់លៀងខួបកំណើតរបស់ភរិយាទីពីររបស់លោក។ លោកបានជាប់ឃុំឃាំងពី ៨ ទៅ ២៥ឆ្នាំ ពីបទក្លែងបន្លំពន្ធ និងជាប់ចោទពីបទឧក្រិដ្ឋផ្សេងៗទៀត។

លោក Bernie Madoff បានទទួលខុសត្រូវលើការឆបោកហិរញ្ញវត្ថុដ៏ធំបំផុត នៅក្នុងប្រវត្តិសាស្ត្រ ដែលបទឧក្រិដ្ឋនេះ បានធ្វើឲ្យវិនិយោគិនខាតបង់ប្រាក់ចំនួនជិត១៨ពាន់លានដុល្លារ។

លោក Madoff បានយកប្រាក់របស់វិនិយោគិន ហើយដាក់វាទៅក្នុងគណនីរបស់ខ្លួន។ លោកសារភាពថា លោកមិនធ្លាប់បានយកប្រាក់របស់អតិថិជនទៅវិនិយោគដោយស្រប ច្បាប់ឡើយ ក្នុងមួយជីវិតឆបោករបស់លោក ហើយក្រុមអ្នកស៊ើបអង្កេត ជឿជាក់ថា ការប្រព្រឹត្តរបស់លោក បានធ្វើឡើងតាំងពីទសវត្សរ៍ឆ្នាំ១៩៧០មកម្ល៉េះ។

ពេលអតិថិជនសួរលោក ទាក់ទងនឹងការដកប្រាក់នេះ លោកបានដកចេញពីគណនី Chase របស់លោក។ អ្វីដែលជាកំហុសឆ្គងទាក់ទងនឹងករណីនេះ គឺថា លោក Madoff បានបម្រើការជាប្រធានក្រុមប្រឹក្សាភិបាលនៅក្នុងសមាគមជាតិ ពាណិជ្ជករមូលបត្រ។ លោក Madoff ត្រូវបានជាប់ឃុំរយៈពេល១៥០ឆ្នាំ។

ភាពក្ស័យធនរបស់ MF Global បានក្លាយទៅជាព័ត៌មានដ៏ក្តៅគគុក ដោយសារតែលទ្ធភាពដែលធ្វើឲ្យបាត់បង់ប្រាក់របស់អតិថិជនចំនួន ប្រមាណជា ៦០០លានដុល្លារ។

ក្រុមហ៊ុននេះ ស្ថិតក្រោមការគ្រប់គ្រងរបស់លោក Jon Corzine ដែលជាអតីតប្រធាននាយកប្រតិបត្តិរបស់ Gold Sachs និងជាអតីតអភិបាលរដ្ឋ New Jersey។ បើតាមការរាយការណ៍ FBI បានបើកឲ្យមានការស៊ើបអង្កេតករណីនេះ។

ទោះបីជា Enron, Lehman Brothers, AIG, Waste Management, Jerome Kerviel, Nick Leeson មានការគ្រប់គ្រងតឹងរ៉ឹងក៏ដោយ ប៉ុន្តែការធ្វើកំណែទម្រង់វដ្តនេះ នៅតែបន្ត។ ប្រហែល នេះជាចលនានៃ «ការកាន់កាប់វិថី wall street» ការបាតុកម្មប្រឆាំងនឹងវិសមភាពសេដ្ឋកិច្ច ភាពលោភលន់ និងអំពើពុករលួយ នឹងបង្កើតឲ្យមានចំណុចដែលស័ក្តិសមនឹងទទួលការចាប់អារម្មណ៍៕CS

ប្រធាននាយកប្រតិបត្តិក្រុមហ៊ុនវិនិយោគិនកម្ពុជា។ អ៊ីមែល: anthonygalliano@covenantim.com

ការធ្វើទីផ្សារជាមធ្យោបាយមានប្រសិទ្ធភាពក្នុងការរក្សាអតិថិជន

ប្រភពៈ ភ្នំពេញប៉ុស្ត៍ WEDNESDAY, 14 DECEMBER 2011 12:00

ANTHONY GALLIANO

កម្មវិធីផ្តល់រង្វាន់របស់ Cell card ជាផ្នែកមួយនៃការធ្វើទីផ្សាររបស់ខ្លួន។រូបថត ជីវ័ន

ភ្នំពេញៈ Peter Drucker អ្នកនិពន្ធ និងជាអ្នកពិគ្រោះយោបល់ជនជាតិអាមេរិក ទទួលបានភាពល្បីល្បាញដោយសារតែសម្តីរបស់លោក ដែលត្រូវបានគេដកស្រង់មកថា៖ «គោលបំណងនៃការធ្វើទីផ្សារ គឺចង់ដឹង និងយល់ច្បាស់អំពីអតិថិជន ដើម្បីលក់ផលិតផល ឬសេវាកម្មឲ្យដាច់»។

ការធ្វើទីផ្សារ ជាផ្នែកមួយដ៏សំខាន់នៃការគ្រប់គ្រងអាជីវកម្ម ពោលគឺវាសំខាន់ដូចផលិតកម្ម និងហិរញ្ញវត្ថុដែរ។ ខណៈដែលការធ្វើទីផ្សារ ទទួលបានការផ្តោតជាសំខាន់នៅក្នុងប្រទេសអភិវឌ្ឍន៍បច្ចុប្បន្ន វាក៏កំពុងទទួលបានការចាប់អារម្មណ៍កាន់តែខ្លាំងលើទីផ្សារដែល កំពុងរីកចម្រើនផងដែរ។

ការធ្វើទីផ្សារ ជាដំណើរការមួយ ដែលគេប្រើដើម្បីកំណត់ផលិតផល និងសេវាកម្មដែលអាចជាទីចាប់អារម្មណ៍របស់អតិថិជនជាច្រើន ហើយដំណើរការនេះ រាប់បញ្ចូលទាំងមុខងារនៃការលក់ ទំនាក់ទំនងសាធារណៈ ការកំណត់តម្លៃ ការវេចខ្ចប់ និងការចែកចាយផងដែរ។

វាជាបច្ចេកទេសមួយក្នុងការកំណត់អតិថិជន ការប្រមើលមើល និងការបំពេញតាមលក្ខខណ្ឌរបស់អតិថិជន ក៏ដូចជាការរក្សាទំនាក់ទំនងរបស់អតិថិជន តាមមធ្យោបាយដែលផ្តល់ប្រយោជន៍ដល់ក្រុមហ៊ុន និងម្ចាស់ភាគហ៊ុន។

«ការធ្វើទីផ្សារចម្រុះ» ជាវិធីសាស្ត្រដែលគេពេញនិយមប្រើជាងគេនៅក្នុងការធ្វើទីផ្សារ។ វិធីសាស្ត្រនេះ រួមមានកត្តាជាច្រើន ដែលគេអាចគ្រប់គ្រងបាន ក្នុងនោះ មានដូចជា 4P ជាដើម ដែលតំណាងឲ្យផលិតផល តម្លៃ ទីកន្លែង និងការផ្តល់ជូនពិសេស។

វត្ថុបំណងនៃការធ្វើទីផ្សារនេះ គឺការបង្កើតយុទ្ធសាស្ត្រមួយដែល 4P ផ្តោតជាសំខាន់លើអតិថិជន នៅក្នុងទីផ្សារគោលដៅដើម្បីបង្កើតតម្លៃឆ្លើយតបជាវិជ្ជមាន។ ការពង្រីកគោលគំនិតនេះ រហូតដល់ការវេចខ្ចប់ ការរក្សាទីផ្សារ និងមនុស្ស ត្រូវគេស្គាល់ថា7P។

ផលិតផល រាប់បញ្ចូលទាំងឈ្មោះពាណិជ្ជកម្ម ស្លាកសញ្ញា ការផ្ដល់សេវាកម្ម និងគុណភាព។ តម្លៃ ជាយុទ្ធសាស្ត្រកំណត់តម្លៃផលិតផល ការបញ្ចុះតម្លៃ និងភាពបត់បែន។ ទីផ្សារ ពាក់ព័ន្ធនឹងមធ្យោបាយចែកចាយ ការគ្របដណ្តប់ទីផ្សារ ការគ្រប់គ្រងស្តុក និងការរៀបរាប់លម្អិតអំពីការដឹកជញ្ជូន។ ការផ្តល់ជូនជាពិសេស រួមមាន ការផ្សាយពាណិជ្ជកម្ម កម្លាំងលក់ ការទំនាក់ទំនង និងការផ្សាយជាសាធារណៈ។

ការធ្វើទីផ្សារកំពុងមានការទទួលស្គាល់នៅកម្ពុជា ដោយសារតែភាពជោគជ័យនៃការយល់ដឹងអំពីម៉ាកផលិតផល និងស្លាកសញ្ញាដែលមានការទួលស្គាល់ ជាពិសេសក្នុងចំណោមក្រុមហ៊ុនទូរគមនាគមន៍ សេវាហិរញ្ញវត្ថុ ម្ហូបអាហារ និងភេសជ្ជៈ រួមទាំងក្រុមហ៊ុនទទួលបដិសណ្ឋារកិច្ច។ វាជារឿងសាមញ្ញសម្រាប់ការធ្វើទីផ្សារនៅតាមដងផ្លូវ ដើម្បីផ្សព្វផ្សាយពាណិជ្ជកម្ម និងផ្តល់ជូនពិសេស។

ក្រុមហ៊ុនជាច្រើន កំពុងប្រើប្រាស់រថយន្ត ក្តារបិទផ្សាយ និងកន្លែងសំខាន់ ដើម្បីបង្កើនការស្គាល់ម៉ាកផលិតផលរបស់ខ្លួន។ ក្រៅពីនោះ ក្រុមហ៊ុនទាំងនោះ កំពុងបណ្តាក់ទុនលើអគារ និងការិយាល័យខ្លួនដើម្បីផ្សព្វផ្សាយ សញ្ញាពាណិជ្ជកម្មរបស់ខ្លួន។

ក្រុមហ៊ុនមួយចំនួន កំពុងបង្កើនភាពស្មោះត្រង់របស់អតិថិជន តាមរយៈកម្មវិធីផ្តល់រង្វាន់។ ហាងកាហ្វេជាច្រើន មានការផ្តល់ជូនកាតដល់អតិថិជន ដោយឲ្យអតិថិជនទទួលទានកាហ្វេម្តងដោយឥតគិតថ្លៃ នៅពេលពួកគេ ទិញកាហ្វេជាច្រើនដង។

ភោជនីយដ្ឋានមួយចំនួន នឹងផ្តល់អាហារដោយឥតគិតថ្លៃផងដែរ។ ចំណែកផ្សារទំនើប ក៏មានផ្តល់ជូនជា Coupon ដែលមានតម្លៃជាសាច់ប្រាក់ នៅពេលដែលអតិថិជនសន្សំគ្រប់ពិន្ទុ។

ការផ្តល់ជូនពិសេសពីក្រុមហ៊ុនមួយ តាមរយៈការឧបត្ថម្ភការប្រគំតន្ត្រី ឬកីឡា ជាពិសេសមួយផ្សេងទៀត ដើម្បីបង្កើនភាពស្មោះត្រង់របស់អតិថិជនផងដែរ។

អតិថិជន ពិតជាស្ងើចសរសើរជាខ្លាំង នៅពេលទទួលបានអ្វីដោយឥតគិតថ្លៃ។ កម្មវិធីទាំងនេះ ពិតជាល្អប្រសើរក្នុងការរក្សាភាពស្មោះត្រង់របស់អតិថិជន។

ក្រុមហ៊ុនជាច្រើន បានទទួលស្គាល់ថា ការរក្សាគុណភាពខ្ពស់ និងការបង្ហោះព័ត៌មានថ្មីៗនៅលើគេហទំព័រ ជាកត្តាសំខាន់។ ថ្វីបើយ៉ាងនេះក្តី មានក្រុមហ៊ុនជាច្រើន ដែលមិនមានគេហទំព័រ ហើយក្រុមហ៊ុនជាច្រើនទៀត ដែលមានគេហទំព័រហើយ ប៉ុន្តែគ្រប់គ្រងវាមិនបានល្អ មិនបានបង្ហាញព័ត៌មាន និងខ្លឹមសារថ្មីៗ និងប្រកបដោយគំនិតច្នៃប្រឌិត ឬប្រើប្រាស់អ៊ីនធឺណិត ដើម្បីផ្សព្វផ្សាយផលិតផលរបស់ខ្លួនឡើយ។

ការប្រើប្រាស់ប្រព័ន្ធផ្សព្វផ្សាយ កំពុងកើនឡើង។ នេះជាកត្តាសំខាន់ក្នុងការសម្រេចបានជោគជ័យគួបផ្សំនឹងការចេញ សេចក្តីប្រកាសព័ត៌មាន បទសម្ភាសនាយកប្រតិបត្តិ និងផ្សាយពាណិជ្ជកម្ម។

ទោះបីយ៉ាងនេះក្តី ក្រុមហ៊ុនជាច្រើនដែលមិនមានបុគ្គលិកច្រើន កំពុងប្រើប្រាស់សិក្ខាសាលា និងបទបង្ហាញ ដើម្បីជាកម្មវិធីយុទ្ធសាស្ត្ររបស់ខ្លួន។

ដោយសារអតិថិជន កាន់តែមានការចាប់អារម្មណ៍ ហើយការប្រកួតប្រជែងផ្តល់នូវជម្រើស និងតម្លៃកាន់តែច្រើន ដូច្នេះការពង្រឹងយុទ្ធសាស្ត្រទីផ្សារ អាចជួយឲ្យក្រុមហ៊ុនរស់រានបានយូរ៕CS

លោក Anthony Galliano ប្រធាននាយកប្រតិបត្តិក្រុមហ៊ុនគ្រប់គ្រងការវិនិយោគកម្ពុជា។ អ៊ីមែលៈ anthonygalliano@covenantim.com

Saturday, December 17, 2011

Your Slideshow Title Slideshow

Your Slideshow Title Slideshow: TripAdvisor™ TripWow ★ Your Slideshow Title Slideshow ★ to United States, United Arab Emirates and Jaipur. Stunning free travel slideshows on TripAdvisor

ទំព័រ

Wednesday, December 21, 2011

លីប៊ី​និង​តុលាការ​ក្រុង​ឡាអេ​ដណ្តើមគ្នា​កាត់ទោស​កូនប្រុស​របស់​លោក​កាដាហ្វ៊ី

Sunday, December 18, 2011

ក្រុម​ហ៊ុន​ធំៗរបស់ជប៉ុន​ស្វែងរកឱកាស​នៅកម្ពុជា

ការ​ប្រព្រឹត្ត​បទ​ឧក្រិដ្ឋ​ក្នុង​ប្រព័ន្ធ​ហិរញ្ញវត្ថុ​របស់​ពួក​វិនិយោគិន​ធំ​ៗ

ការ​ធ្វើ​ទីផ្សារ​ជា​មធ្យោបាយ​មាន​ប្រសិទ្ធ​ភាព​ក្នុង​ការ​រក្សា​អតិថិជន